事源因為疫情關係，本身憧憬住去海外影婚紗相嘅我唯有放棄呢個念頭，於是乎就開始search下本地嘅婚攝公司，上網爬下文，問朋友打聽下去邊度影好。最後因應網絡大數據，某日俾我係小紅書睇到Hyehwa Studio出嘅post，當時就咁睇相已經好岩心水，每張相都充滿住韓式個種自然清新簡約style。

由於簡介話係「真正韓國人攝影師拍攝」，起初我會考慮到價錢方面一定唔平，隔左成兩、三個星期之後，我都係心思思忍唔住去inbox查詢下！ 佢地即時回覆，仲whatsapp埋價目表俾我，價錢方面比起預期中係非常合理，所以我都即刻約埋時間上去了解下。

到左會面個日，我同老公一齊黎到位於葵涌天際中心嘅studio，踏入門口見到入面陽光好充足、環境闊落，配合埋白色地毯、落地大玻璃同白色窗簾，俾人一種舒適嘅感覺🥰。跟住同我地見面嘅有來自韓國嘅攝影師阿Jo同翻譯助手Elsie，佢地兩位都好親切隨和，過程中會問下我地想去咩地方影相、全日拍攝時間大概係幾多、package包啲乜，亦都提供啲客人影左嘅相俾我地參考。佢地講解得好詳細，仲提供左好多意見，例如會根據客人想影咩style從而建議去邊度取景會影得靚⋯⋯全程有Elsie做翻譯，加上攝影師嘅耐心講解，我地都溝通得非常順利，可以感受到佢地對客人嘅細心。

跟住我地都即時簽返contract，除左影pre wedding之外仲加埋影signing day。

服裝方面，package會包一條婚紗同一套男士禮服（婚紗可以即場係studio度試），另外亦都會安排上去佢地合作嘅婚紗公司Kiswedding度試裙同男禮。

.................................................................................................................................................................................

Kiswedding入面有好多唔同款式嘅婚紗同晚裝，要多謝細心友善嘅Iris係試裙個陣俾到我好多提議，等我揀左1條輕婚紗加1條紅色晚裝出去影外景，影出黎嘅效果都好靚！

................................................................................................................................................................................ 

影pre wedding之前Elsie會開一個WhatsApp group，有咩想法或問題都可以同佢地講，到左差唔多影相嘅前幾日就會收到行程表、注意事項。Shooting Day當日，package包左新娘化妝 我同老公一早上到化妝師嘅工作室度化好妝，然後一齊上去天際中心嘅studio度影左室內場景先，影相個陣有翻譯助手Elsie同Winnie幫手做講解，攝影師阿Jo超級專業 會教我地擺咩pose、俾咩表情，企埋上梯高炒完全冇問題。食完午餐之後，我地就由室內移師到中環，之後再搭小輪影到去尖沙咀。

出去影外景，化妝師Jessica同助手Winnie全日都會陪住我地 (係呢度我好想多謝Jessica，佢化嘅韓式妝容好靚，影足成日都冇花過個妝，而且佢真係好細心體貼，唔介意陪我入洗手間換衫，最後影完相我忍唔住要大力俾個擁抱佢🤣)。由於我地影外景個陣差唔多就到放工時間，街上面都算多人，攝影師阿Jo會第一時間衝去mark實啲靚位，仲要拎住兩大袋工具同補光燈（我心入面深深地欣賞佢嘅熱誠，同時亦都辛苦晒助手Winnie幫我影左啲小花絮）。影完相當晚攝影師阿Jo會send返大約10張執左嘅相俾我地睇返效果(佢真係好用心、好勤力!)，睇完我都好滿意！